Unha praga de cascudas amarga a vida da veciñanza de Lariño

Foto: La Voz de Galicia

Unha praga de cascudas ten en xaque desde hai uns meses á veciñanza de Lariño, o que os levou a denunciar ante o Concello a súa situación. Este contratou unha empresa especializada en fumigacións, e logo anunciou na prensa que a praga fora «controlada». Porén en realidade as medidas non parecen estar sendo efectivas, pois o foco, especialmente activo de noite (de día non se ven), non para de medrar, como se pode ver no video que acompaña esta entrada, obtido esta mesma semana por un veciño.

O alcalde díxolles que «hai que ter paciencia» e que a solución «vai tardar 6 meses». Mais a explicación non tranquiliza en absoluto ás persoas afectadas, que se puxeron en contacto co BNG para pedir axuda e apoio ante unha situación que xa chegou ata o punto de que os insectos comezan a infiltrarse nas vivendas dos residentes de varias zonas de Lariño.

A veciñanza relatounos con impotencia que algunhas persoas, sobre todo maiores, están afacéndose a convivir cun problema que ameaza a saúde pública, e que algún afectado xa non durme de noite.