Iván é desenvolvedor de software e pasou a súa infancia en Barakaldo, onde a súa nai e seu pai, de Carnota e Valdeorras, emigraran. Ali formouse e comezou a traballar, ata que despois da catástrofe do Prestige en 2002 comezou a botar tempadas en Carnota para botar unha man na limpeza do chapapote, como fixeron outros 190.000 voluntarios e voluntarias. Porén Iván levou o seu compromiso máis alá, e decidiu asentarse definitivamente na terra da súa nai, onde remataría retornando toda a súa familia, e onde Iván remataría formando a súa.
O compromiso social que adquiriu durante os peores meses do chapapote levouno tamén a comprometerse co medio ambiente e o asociacionismo veciñal (participando en 2010 na fundación da Asociación Monte Pindo Parque Natural e pouco despois na ACDR O Patín de Carnota), e tamén un crecente interese polo devir político do seu municipio e da súa nación, que o levou primeiro a afiliarse a Galiza Nova, e a logo comprometerse en 2011 coa candidatura que impulsaba daquela Ramón Noceda e que aspiraba a lograr desbancar do goberno de Carnota a un PP que levara o Concello ao borde da insolvencia. Acadado ese obxectivo, xa no goberno Iván ocupouse das áreas de mocidade, cultura, turismo ou medio ambiente, asi coma da tenencia de alcaldía, en distintas etapas. Asi mesmo, no 2017 acepta a responsabilidade local do BNG de Carnota, máximo cargo orgánico do nacionalismo na localidade.
Hai 0 opinións.
Publica a túa!