Contar polos dedos (avanzo da Moa nº 24)

O PP, durante os oito anos que estivo na oposición, non se cansaba de dicir que o Concello de Carnota estaba arruinado. Durante a campaña un dos seus eixos principais foi dicir que o Concello estaba arruinado. E cando acadou á alcaldía, segueu co mesmo conto. A calquera que lle entra pola porta o primeiro que lle di é que o Concello de Carnota está arruinado. Di que está arruinado pero non di por qué, e é que as cifras non son o seu.

Será que o Concello non ten cartos? O Goberno saínte deixoulle 147.000 euros montantes na caixa. Será que os proveedores non cobraban cunha relativa regularidade? Cando menos non deixamos xerada unha alarma de falta de pago como o PP deixou hai 8 anos. Será que o Concello ten unha cantidade de débedas que non poida asumir? O Consello de Contas de Galiza, que é o máximo órgano fiscalizador dos concellos, puxo ao Concello de Carnota como un dos exemplos galegos de boa xestión financieira, tal e como foi publicado na prensa. Tamén é curioso o feito de que no PP trataran de vetar os orzamentos máis inversores da nosa historia, os deste ano.

Parécevos esta a situación dun "concello arruinado"? Nós, que aínda entendemos algo de números, cremos que non. A que se debe logo tanta insistencia? Se cadra o alcalde está convencido de que cando unha mentira se repite cen veces convírtese en verdade. Pero todos sabedes que unha mentira repetida cen ou mil veces segue a ser unha mentira.

Non temos por costume entrar a comentar chascarrillos sen importancia se non tivera un trasfondo de extrema gravidade. Ao longo de toda a súa carreira política o Sr. Oreiro non se caracterizou por estar forte en contas e en números, precisamente. E para facer unha xestión eficaz dos cartos no Concello hai que ter rixe e control: hai que saber algo máis que contar polos dedos e andar aos contos nas corredoiras.

Evidentemente estamos diante dunha estratexia disuasoria. Moito nos tememos que á volta dun ano ou dous se comece a producir unha situación financeira grave no Concello de Carnota como xa pasara hai 8 anos. Están a tempo de levalo ben, asumindo e continuando o traballo de anos do BNG para dar levantado a situación económica verdadeiramente crítica que nos atopamos ao chegar ao goberno no ano 99.

Se non o fan será única e exclusivamente por responsabilidade súa. E que non lle queiran cargar o morto a outros.