Poucas horas logo de saberse os resultados das eleicións xa estaba en boca de todos os veciños o rumor de que Oreiro non chegará a ocupar a alcaldía de Carnota debido ao seu cargo no Congreso dos Deputados, delegando así as súas responsabilidades nalgún dos seus segundóns. Xa sabíamos que a seriedade non é precisamente unha das virtudes que caracterizan ao futuro rexedor de Carnota, pero que a estas alturas queira simular que se está cuestionando quen vai ocupala alcaldía é unha absoluta irracionalidade, que somentes pode respostar ás demandas da prensa rosa.O Sr. Oreiro, totalmente ninguneado incluso polos seus no Congreso de Deputados, quere facernos crer que ten "tanto protagonismo" en Madrid que dubida se volver para Carnota. Entendemos que non lle guste pasar á historia como o simple levantamáns que foi durante estes anos, con escasísimas intervencións de aínda máis escasa relevancia, e rara vez sequera vencelladas a Galiza, xa non dicimos a Carnota. Pero todo o mundo sabe que cando perdeu as eleccións hai 8 anos estivo durante meses chorando a súa desgracia por todos os recunchos da nosa xeografía. De feito, foi o seu afán desmedido pola alcaldía de Carnota os que lle fixeron cometer os excesos que o levaron, precisamente, a perder o goberno municipal. Entón, a que responde agora que veña remoloneando cando por fin acadou a desexada alcaldía de novo?
Sr. Oreiro, non tome aos veciños de Carnota por parvos, ocupe dunha vez a alcaldía e déixese de pantomimas.
Hai 0 opinións.
Publica a túa!