Os ecoloxistas solicitan a apertura da fervenza do Ézaro

O pasado día 16 de abril membros da Iniciativa Lexislativa Popular para a protección, a conservación e a mellora dos ríos galegos achegaronse ao encoro do río Xallas en Carnota para manifestar o seu rexeitamento "á burla que supón que o único río de Europa que desemboca en fervenza no mar, o faga na actualidade por unhas tubarías", como declarou Xan Carlos Fernández, de ADEGA.
Como parte do acto, tivo lugar a apertura simbólica das comportas do encoro. Ademais, os membros da promotora da iniciativa sacaron pancartas e esixiron o derrubamento do encoro, pois "é máis rendíbel cultural, social e turísticamente que a cantidade de watios que poida producirlle a unha empresa privada".
Tamén aproveitaron para denunciar o cinismo das autoridades competentes, citando o feito de que a Xunta inaugurou a bombo e platillo a apertura da fervenza, pero que realmente acabou funcionando tan só unha hora diaria dos domingos do mes de agosto, ou o que é o mesmo, catro horas ao ano.
Pero como ben tivemos ocasión de comprobar durante as Xornadas de Verán organizadas por Galiza Nova en Carnota no ano 2003, e en que unha das actividades programadas era a visita á fervenza do Xallas en "horario de apertura", acabamos contemplando decepcionados como caía un groliño de auga durante menos de media hora.
(Fonte: A Peneira)


A fervenza do Xallas, un patrimonio ecolóxico
único en Europa ao servizo dos intereses privados